محتاج اتجاوز وانسي شخص كنت مرتبط بيه فتره كبيره...

الرد من العميل

الشخص ده فى بدايه معرفتي بيه كان الاعجاب من طرفه واشهد انه كان بيحبني وبعد كده اتغير نتيجه اننا مش فاهمين بعض وحاولت معاه كتير اننا نرجع لحد ما اكتشفت ان فى شخص تانى هي كانت على علاقه بيه ومره واحده قفلت قولتلها مش عايز اشوف وشك ولا اعرف ساعتها اتهزت وبدأت تتكلم معايا وان ده موضوع منتهي وعيطت اونها غلطانه وانها بتحبني انا وانها عملت كده عشان تخليني اغير ومع الوقت رجعنا تانى لبعض واتخطبنا واتفقنا على حاجات كتير وومره واحد كل شىء اتغير فى لحظه نتيجه اختلفنا فى موضوع الشقه ومكانها ساعتها قولتلها قدام اهلها ان دى امكانياتي رغم اننا كنا متفقين من البدايه ومره واحده جت قالتلى انها استخارت ربنا ومش عايزه تكمل لانها مش قادره تحبني وكانت بتحاول طول الفتره اللى فاتت حاولت اتكلم معاه وافهمها ان دى امور بسيطه ممكن نتكلم ونتفاهم بس رفضت ساعتها حسيت بالصدمه نتيجه انى كان نفسي بس اسمع انها معايا فى اى حاجه مش مهم اى حاجه تانيه ورغم كل حاجه عملتها معاها ووقفت جنبها وكانت هى حياتى باعترافها وان اكتر حد مستحملها وفى الاخر بتكلمنى فى اسباب تافهه زى احنا مختلفين و ان نسيت اول عيد حب بينا و انى مفكرتش اجيب هديه وانها حاسه باننا مع بعض ولا المتجوزين بقالنا 10 سنين ورغم انها مش بتحب الخروج بتلومنى انى مفكرتش احجز مكان واقولها يلا قومي البسي حلو ونخرج ... انا موجوع بأن رغم حبي ليها انى حسيت مليش اى رصيد فى اى حاجه اننا نتكلم ونعالج اى مشكله ومحستش بأى تقدير انما هى شايفه طبيعي اننا نسيب بعض دلوقتى احسن ما نتطلق بعدين بكل برود اون من جواها فى حيطه سد نتيجه اننا لما اختلفنا وكنا قاعدين مع اهلنا بنتكلم فى موضوع الشقه وكنت مضايق انى كان نفسي اسمع تقول مش مهم اى حاجه المهم انى معاه وسيبتها 4 ايام متلكمتش ولما اتكلمنا بعدها حصل اللى حكيته فوق وقالتلى ان طبعي مش هيتغير وبعد كام يومين عرفت واتأكدت انها بتتكلم مع شخص تانى ولا اكن كان فى حاجه بكل بساطه وبسرعه ... انا موجوع اوى منها وزعلان على نفسي وحاسس انى حياتى واقفه قلبي واجعنى لدرجه محدش يتخيلها اى حد هيقولى الايام هتنسيك وانها هتعدى فانا متأكد من ده ولحد ما ده يحصل انا بتقطع وحاسس انى لوحدى بعد ما قطعت مع كل اصحابي عشان فضلتها عليهم عارف انها غلطتى بس اهو اللى حصل وعارف ان لازم ادفع ضريبه تصرفي لوحدى ... نفسي اتعافى وانساها ومش عايز افتكرها ولا اكنها عديت على حياتى ... نفسي امسح اخر سنتين هى كانت فيهم بحلوهم ومرهم .... عايز ارجع طبيعي ومفيش حاجه فارقه معايا .. نفسي افهم ليه الانسان ممكن يتخلى بعد طول المده دي بسهوله ولا اكن كان فى شخص بحياتها للدرجه دى استاهل اتساب ومفيش اى حاجه حلوه تشفعلى اى غلطه لو انا غلطان .. تفتكرى المفروض اعمل ايه وانا حاسس انى لوحدى عارف انى المفروض اغير اسلوب حياتى واشغل وقتى بس مش عارف ومش حاسس انى قادر اقابل ناس جديده ولا اتعرف على حد ولا ارتبط بحد تانى .. رغم كل اللى عملته فيا مش عارف اكرهها رغم فيه مليون سبب انى اكرهها كل الكلام اللى كاتبه ده وجوايا كلام كتير مش قادر اعبر عنه حاسس ان عايز حد يضرب ايده فى صدرى يموتلى قلبي ويريحنى .. انا تعباااااان بجد ونفسي حد ياخد بايدي ويساعدنى اطلع من كل ده