السلام عليكم انا عندي ٤٢ سنه و ام لاربع ابناء،...

السلام عليكم انا عندي ٤٢ سنه و ام لاربع ابناء، بنتين توام ١٨ سنه وولد ١٦ وبنت ١٤, اطلقت من باباهم من ٢٠١٧ ، تزوجت ٢٠٢٠ ، عندي اكتئاب من ٢٠١٦ باخد ادويه اخدت سيبراليكس فتره ثم الان افكسور ١٥٠ صباحا و ٧٥ مساءا و اميبريد. انا حاسه اني بقيت حساسه جدا اتجاه كل حاجه و مش عارفه احدد حاسه بايه و قلقي بياثر على النوم وكوابيس و بجز على سناني حتى وانا صاحيه و ضربات قلب سريعه. انا زوجي حاليا في الامارات وانا اولادي في مصر و السنه اللي فاتت قضيتها شهرين في مصر و شهر في الامارات .السنه دي مش قادره اعمل كده . انا اولادي كانو عند باباهم من وقت جوازي و كانو بيجولي في اجازه اخر الاسبوع فقط، بس هو باباهم مش بيصرف عليهم طول الوقت، يعني احنياجاتهم من لبس و دروس مدرسه و خروج و مواصلات مش متكفل بيها لكن من وقت للتاني بيديلهم مبلغ بسيط، لكن انا اللي احتياجاتهم بجيبهالهم الاول بابايا كان بيديني ولما اتجوزت جوزي بيديني و بشتغل برضو. انا تعبت اوي في جوازي الاول، وربيت الاولاد لوحدي و مريت بمراحل صعبه جدا كنت بشتغل فيها طول الليل والنهار و بوصلهم دروس و تمارين و مدرسه و بربيهم و كل حاجه، و ضغط باباهم و الطلاق، و بابايا للاسف انسان عصبي و فكره الطلاق واني رجعتله باربع اولاد كان كل شويه يحسسني اني في كارثه و ان ازاي حكمل تربيه ٤ و مصاريفهم وطول الوقت تخويف. ضغط واعتراض و كلام سلبي لما كنت عايشه معاهم فتره الطلاق

مساعدة الخبير: هل تم زيارة طبيب حول هذا الأمر؟ هل تم تناول أي أدوية؟

انا دلوقتي كنت عند زوجي في دبي من ١٩ يوم وفي اخر ٣ ايام قرب رجوعي وانا بعيط و مخنوقه و قلبي بيوجعني حرفيا و حاسه اني ام مش كويسه اني مش فرحانه اني راجعه اشوف اولادي، بنتي الصغيره ال١٤ سنه، بتعاني من مشاكل، عصبيه على طول انفعالات مبالغ فيها احساس انها مكروهه و معندهاش صحاب و بتفضل تلعب في الحبوب اللي في جسمها ووشها فبهدلتهم، بتكره تروح عند باباها ففتره سفري بتكون مضايقه جدا بس مبتكونش عايزه تزعلني و تقولي، و بتكون فرحانه جدا اني راجعه، لكن انا المره دي بالرغم من اني روحي فيهم و علاقتي بيهم انهم صحابي بس حاسه بهلع من رجوعي، خوف و رفض رهيب للوضع و حاسه اني مش قادره اواجه اللي بواجهو كل مره ، واني مع جوزي بكون مرتاحه و محدش بيضغط عليا او ياذيني ، بس حاسه اني بظلم اولادي و اني بفكر بانانيه وده مخليني مضايقه اكتر

مساعدة الخبير: هل هناك أي شيء مهم في التاريخ الطبي يجب أن يعرفه الطبيب؟

انا اسفه جدا على الاطاله بس مش عارفه ايه اللي محتاجه اوضحه اكتر