السلام عليكم ورحمة الله وبركاته رأيت في منامي...

السلام عليكم ورحمة الله وبركاته رأيت في منامي إننا في قريتنا وبالتحديد في بيت جدي أبو امي الله يرحمه دخلت انا من بوابة الحوش شفتي جدي الله يرحمه بنص الحوش لابس ثوب ابيض وعاصب على رأسه شماغ أحمر ويثبت بالأرض طوب أبيض متباعد حاطه بشكل مستقيم وكأنه يبي يبني قاطع في الحوش جيت بالمطبخ وكأن كان فيه أمي وخواتي وخالتي فاطمه وأخوي عبدالمجيد ويتكلمون وكأنهم يتكلمون عن عملية ابوي جيت وجلست على السفره وصرت أفطر جاء عبدالمجيد وجلس جمبي قلت له أنتم وش فيكم قال كلمت أبوي وقال لا تجيني الا بعد سبعه شهور أنا انصدمت وقلت ليش وقمت رحت الغرفه خانقتني العبره وصرت أبكي كانت خالتي نوير بالغرفه قالت لا تبكين هو بخير قمت ولبست عبايتي وحجابي والعبايه كانت عباية رأس وكان معي كيسين وطلعت مع باب بأتجاه جيران جدي كنت قاصده إني أروح لهم مو مصدقه ان أبوي بيجلس كل هذي الفتره في المستشفى وكنت حاطه في بالي يا أما يجيبون أبوي او يودوني له وانا طالعه متجهه لبيت جيران جدي كنت محتاره وافكر انا مين أقول له وش أقول التفتت على يساري بجهة بيت جدي شفت عامل لابس لبس هندي وكأن معه طشت صغير وشغاله معها طشت ومنحنيه على فتحت الخزان وكأنها تأخذ مويه واقفين على الخزان ويناظرون بتمعن بأتجاه بيت الجيران اللي انا كنت بروح لهم التفتت ابي اشوف ايش يناظرون شفت جار جدي شايب اسمه دخيل الله متوفي الله يرحمه وكآن جالسه على فرشه مفروشه في الارض بين بيوتهم وماكان عليه الا ملابسه الداخليه ويحاول يقوم وكانت قومته صعبه صرت أمشي وناظرت قدامي في الشعيب شفت عبدالمجيد جالس تحت شجره عند مزرعة جدي بعيد شوي عن البيت ونويت أروح له وصرت امشي وأبكي والغصه بحلقي وقلبي يألمني جاء فيصل ولد خالتي يركض لي وأخذ الأكياس من يدي وقال انتي وين رايحه لا تبكين وانا بس أبكي وكأن الوقت كان العصر قبل المغرب بشوي شافنا عبدالمجيد وجاء يمشي لنا ركبنا بجمس ابوي واخوي ولد خالتي كانوا جالسين بالمرتبه الثانيه ومقابلين بعض وأنا بالمرتبه الثالثه وكنت جالسه بالوسط وكانت الاكياس بيدي وكان فيه مركا (تكايه) قال ولد خالتي هذا صح لـ أبوك قال عبدالمجيد لا وهو يومي برأسه قلت وأنا أبكي لا هذا حق جدتي أبوي حاطه لها بالسياره وقفنا عند بيت جدي ونزلنا دخلت انا مع نفس البوابه شفت جدي عند نفس الطوب ويزيد عدد الطوب بس يحطه عرض بعكس اتجاه الطوب اللي قبل وكانت جدتي بغرفتها وتتكلم معه بس ماكنت اعرف ايش يقولون وانتهت الرؤيا. صحيت من النوم وأنا قلبي يألمني